பொல்கஸ்ஸோவிட்ட, ஹல்பிட்ட பகுதியில் வாடகை வீடொன்றில் தங்கியிருந்து ஹெரோயின் போதைப்பொருள் கடத்தல் மற்றும் பொதி செய்யும் நடவடிக்கைகளில் ஈடுபட்டதாகச் சந்தேகிக்கப்படும் இரண்டு பெண்கள் உள்ளிட்ட ஆறு பேர் கைது செய்யப்பட்டுள்ளனர். அவர்களிடமிருந்து சுமார் 56 இலட்சம் ரூபாய் பெறுமதியான ஹெரோயின் போதைப்பொருள் கைப்பற்றப்பட்டுள்ளதாகப் பொலிஸார் தெரிவித்துள்ளனர்.
கெஸ்பேவ பொலிஸ் நிலையப் பொறுப்பதிகாரியும் பிரதான பொலிஸ் பரிசோதகருமான கே.பி. கலன்சூரியவுக்குக் கிடைத்த இரகசியத் தகவலின் அடிப்படையில் இந்தச் சோதனை நடவடிக்கை முன்னெடுக்கப்பட்டுள்ளது.
இதன்போது, சந்தேகநபர்களிடமிருந்து 112 கிராம் ஹெரோயின், மின்சாரத் தராசு ஒன்று மற்றும் போதைப்பொருட்களைப் பொதி செய்வதற்குப் பயன்படுத்தப்படும் ‘Red Indian’ சின்னம் பொறிக்கப்பட்ட சிறிய காகிதத் தொகுதி என்பனவும் பொலிஸாரால் கைப்பற்றப்பட்டுள்ளன.
கைது செய்யப்பட்டவர்களில் கணவன், மனைவியும் உள்ளடங்குவதாகப் பொலிஸார் தெரிவித்துள்ளனர்.
மேலும், கைது செய்யப்பட்டவர்களில் சில மாதங்களுக்கு முன்னர் பொரலஸ்கமுவ பகுதியில் வீடொன்றுக்குள் புகுந்து பெண்ணொருவருக்குக் கடுமையான காயங்களை ஏற்படுத்திய சம்பவத்தின் பிரதான சந்தேகநபரும் உள்ளடங்குவதாகத் தெரிவிக்கப்படுகிறது.
மற்றொரு சந்தேகநபருக்கு எதிராகத் திருட்டு, கொள்ளை மற்றும் போதைப்பொருள் தொடர்பான குற்றச்சாட்டுகளில் நீதிமன்றத்தில் வழக்குகள் நிலுவையில் உள்ளதாகவும், ஏனைய சந்தேகநபர்களும் பல்வேறு குற்றச்சாட்டுகளுடன் தொடர்புடையவர்கள் எனவும் பொலிஸ் விசாரணைகளில் தெரியவந்துள்ளது.
பிரதான சந்தேகநபரிடம் மேற்கொள்ளப்பட்ட விசாரணைகளின்போது, கைப்பற்றப்பட்ட போதைப்பொருள் தொகுதி திட்டமிட்ட குற்றச்செயல்களுடன் தொடர்புடையவரும் போதைப்பொருள் கடத்தல்காரருமான ‘போதியவத்தே அவிஷ்க’ என்பவருக்குச் சொந்தமானது எனத் தெரியவந்துள்ளதாகப் பொலிஸார் தெரிவித்துள்ளனர்.
குறித்த நபர் வழங்கும் தொலைபேசி அறிவுறுத்தல்களுக்கு அமைவாக, சந்தேகநபர்கள் பல்வேறு இடங்களுக்கு போதைப்பொருட்களை விநியோகிக்கும் வலையமைப்பைப் பராமரித்து வந்ததாகவும் விசாரணைகளில் தெரியவந்துள்ளது.
கைது செய்யப்பட்ட சந்தேகநபர்களைக் கெஸ்பேவ நீதிமன்றத்தில் ஆஜர்படுத்தி, தடுப்புக்காவலில் வைத்து விசாரணை செய்வதற்கான உத்தரவைப் பெறுவதற்குப் பொலிஸார் நடவடிக்கை எடுத்து வருகின்றனர். சம்பவம் தொடர்பான மேலதிக விசாரணைகளை கெஸ்பேவ பொலிஸார் முன்னெடுத்து வருகின்றனர்.
