அக்குறணை நகரில் மீண்டும் ஏற்பட்ட வெள்ளம் காரணமாக, கண்டி – மாத்தளை பிரதான வீதியில் நேற்று சனிக்கிழமை (17) போக்குவரத்து பாதிக்கப்பட்டது.
நேற்று மாலை பெய்த கடும் மழையால், அக்குறணை நகரின் ஊடாகப் பாயும் பிங்கா ஓயா மற்றும் துனுவில வீதியூடாகப் பாயும் வஹுகல ஓயா உள்ளிட்ட கிளை நதிகள் பெருக்கெடுத்தன.
இதனால் கண்டி – மாத்தளை பிரதான வீதி மற்றும் துனுவில வீதி ஆகியன முற்றாக வெள்ளத்தில் மூழ்கின. சுமார் 4 முதல் 5 அடி உயரத்துக்கு வெள்ளம் பாய்ந்ததால் நூற்றுக்கணக்கான வர்த்தக நிலையங்கள் பாதிக்கப்பட்டன.
சுமார் ஒரு மணிநேரத்தில் வெள்ளநீர் வழிந்தோடிய போதிலும், அப்பகுதிகளில் பெருமளவிலான பொருட்சேதம் ஏற்பட்டுள்ளது.
மேலும், நகரின் மத்திய பகுதியூடாகப் பாயும் மகாவலியின் கிளை நதிகளுக்கு மிக அருகில் அமைந்துள்ள கட்டடங்கள் அடிக்கடி வெள்ளப் பாதிப்புகளுக்கு உள்ளாகி வருகின்றன.
அக்குறணை நகரம் அடிக்கடி வெள்ளத்தில் மூழ்குவது தற்போது வழக்கமாகிவிட்டதாக அப்பகுதி மக்கள் கவலை தெரிவிக்கின்றனர்.
