மன்னார் மாவட்ட பொது வைத்தியசாலையில் சுகாதாரத் துறையை மேம்படுத்தும் நோக்கில், கடந்த இரண்டு மாத காலப்பகுதியில் சுமார் 1,000 மில்லியன் ரூபாய் பெறுமதியான கட்டட நிர்மாணப் பணிகள் ஆரம்பிக்கப்பட்டுள்ளன.
இதன் ஒரு பகுதியாக, ஜனாதிபதியின் தலைமையில் 600 மில்லியன் ரூபாய் செலவில் விபத்து மற்றும் அவசர சிகிச்சைப் பிரிவை அமைப்பதற்கான அடிக்கல் நாட்டப்பட்டு, அதற்கான நிர்மாணப் பணிகளும் ஆரம்பிக்கப்பட்டுள்ளன.
இந்நிலையில், 200 மில்லியன் ரூபாய் நிதி ஒதுக்கீட்டில் குழந்தை நலப் பிரிவுக்கான நான்கு மாடிகளைக் கொண்ட கட்டடத் தொகுதி மற்றும் வைத்தியர்களுக்கான விடுதித் தொகுதி ஆகியவற்றை அமைப்பதற்கான அடிக்கல் நாட்டும் நிகழ்வு இன்று (15) காலை 10 மணியளவில் நடைபெற்றது.
மன்னார் மாவட்ட பொது வைத்தியசாலையின் பிரதி பணிப்பாளர் தலைமையில் நடைபெற்ற இந்நிகழ்வில், பிரதி அமைச்சர்களான அன்ரன் ஜெயக்கொடி, உபாலி சமரசிங்க மற்றும் நாடாளுமன்ற உறுப்பினர் எம். ஜெகதீஸ்வரன் ஆகியோர் இணைந்து அடிக்கல் நாட்டி வைத்தனர்.
இதன்போது மன்னார் மாவட்ட அரசாங்க அதிபர், வைத்தியர்கள் மற்றும் வைத்தியசாலைப் பணியாளர்கள் உள்ளிட்டோர் கலந்துகொண்டனர்.
மன்னார் மாவட்ட பொது வைத்தியசாலையின் உட்கட்டமைப்பு வசதிகளை மேம்படுத்தி, மக்களுக்கான சுகாதார சேவைகளை வலுப்படுத்தும் நோக்கில் இக்கட்டுமானப் பணிகள் முன்னெடுக்கப்பட்டு வருகின்றமை குறிப்பிடத்தக்கது
