நாட்டின் மருந்துத் தேவைகளுக்கான இறக்குமதியைக் குறைத்து, தேசிய மருந்து உற்பத்தியை விரிவுபடுத்துவதுடன், ஏற்றுமதி வருவாயை அதிகரிப்பதே எதிர்வரும் தசாப்தத்தில் அரசாங்கத்தின் பிரதான இலக்காகும் என சுகாதார மற்றும் ஊடக அமைச்சர் வைத்தியர் நளிந்த ஜயதிஸ்ஸ தெரிவித்துள்ளார்.
காலி, கொக்கல ஏற்றுமதிச் செயற்பாட்டு வலயத்தில் அமைந்துள்ள தனியார் நிறுவனமொன்றின் இன்சுலின் உற்பத்தித் தொழிற்சாலைக்கு கடந்த சனிக்கிழமை (17) விஜயம் செய்தபோது அமைச்சர் இதனைத் தெரிவித்துள்ளார்.
இன்சுலின் உற்பத்திக்கு மேலதிகமாக, மயக்க மருந்துகள் மற்றும் வலி நிவாரணிகள் உள்ளிட்ட மருந்து வகைகளையும் உற்பத்தி செய்ய குறித்த நிறுவனம் திட்டமிட்டுள்ளதாக அவர் குறிப்பிட்டுள்ளார். எதிர்காலத்தில் 33 வகையான மருந்துகளை உற்பத்தி செய்யும் திறனை விரிவுபடுத்துவதே இதன் நோக்கமாகும்.
நாட்டின் வைத்தியசாலைகளுக்குத் தேவையான மருந்துகளில் சுமார் 85 முதல் 90 சதவீதம் வரை இறக்குமதி செய்யப்படுகின்றன. உள்நாட்டில் உற்பத்தி செய்யப்படும் மருந்துகள் மூலம் மொத்தத் தேவையில் 10 முதல் 15 சதவீதம் மட்டுமே பூர்த்தி செய்யப்படுகின்றன.
கொவிட் தொற்று மற்றும் பொருளாதார நெருக்கடி காரணமாக மருந்து விநியோகத்தில் ஏற்பட்ட தடைகளைக் கருத்திற்கொண்டு, கடந்த இரண்டு ஆண்டுகளாக வைத்தியசாலைகளுக்குத் தொடர்ச்சியாக மருந்துகளை வழங்குவதை உறுதிப்படுத்துவதில் அரசாங்கம் விசேட கவனம் செலுத்தி வருகிறது. தற்போது வைத்தியசாலைகளுக்குத் தேவையான மருந்து விநியோகத்தில் சுமார் 96 சதவீதத்தைப் பூர்த்தி செய்ய முடிந்துள்ளதாகவும் அமைச்சர் தெரிவித்துள்ளார்.
எஞ்சியுள்ள தேவைகளில் 37 வகையான மருந்துகளைக் கொள்வனவு செய்வதற்கான செயல்முறைகளில் விநியோகஸ்தர்கள் ஈடுபடவில்லை என்றும் அவர் குறிப்பிட்டுள்ளார்.
தேசிய மருந்து உற்பத்தித் துறையை வலுப்படுத்துவதன் மூலம், மருந்து இறக்குமதிக்காகச் செலவிடப்படும் அந்நியச் செலாவணியைச் சேமிக்க முடியும். அதேவேளை, உள்நாட்டில் உற்பத்தி செய்யப்படும் மருந்துகளை ஏற்றுமதி செய்வதன் மூலம் நாட்டுக்குப் புதிய வருமான வழிகளையும் உருவாக்க முடியும் என அமைச்சர் சுட்டிக்காட்டியுள்ளார்.
நாட்டின் நிலப்பரப்பும் மக்கள் தொகையும் சிறியதாக இருப்பது, சர்வதேச தரத்திற்கு இணையான மருந்து உற்பத்தித் துறையை உருவாக்குவதற்குத் தடையாக அமையாது என்றும் அவர் தெரிவித்துள்ளார். தேவையான தரநிலைகள் மற்றும் ஒழுங்குமுறைத் தேவைகளைப் பூர்த்தி செய்து உள்நாட்டு உற்பத்தியாளர்கள் முன்னேறுவதற்கு அரசாங்கம் முழுமையான ஒத்துழைப்பை வழங்கும் எனவும் உறுதியளித்துள்ளார்.
தற்போது இலங்கைக்குத் தேவையான இன்சுலின் பிரதானமாக இந்தியாவிலுள்ள நான்கு நிறுவனங்களிடமிருந்து இறக்குமதி செய்யப்படுகின்றது. எனவே, உள்நாட்டில் இன்சுலின் உற்பத்தியை ஆரம்பிப்பதன் மூலம் அதன் தொடர்ச்சியான விநியோகத்தை உறுதிப்படுத்துவதுடன், உற்பத்தியின் தரத்தைக் கண்காணிக்கும் திறனையும் மேலும் வலுப்படுத்த முடியும் என அமைச்சர் தெரிவித்துள்ளார்.
இந்த இன்சுலின் உற்பத்தித் தொழிற்சாலையை நிறுவுவது தேசிய மருந்து உற்பத்தித் துறையில் ஒரு முக்கிய முன்னேற்றமாக அமையும் என்றும் அவர் மேலும் குறிப்பிட்டுள்ளார்.
