இலங்கையில் வழக்கமான வாகனப் பதிவு இலக்கங்களுக்குப் பதிலாக, தனிநபர்களின் பெயர்கள் அல்லது வணிக நிறுவனங்களின் பெயர்களைக் கொண்ட தனிப்பயனாக்கப்பட்ட வாகன இலக்கத் தகடுகளை அறிமுகப்படுத்துவது குறித்து பரிசீலிக்கப்பட்டு வருகிறது.
போக்குவரத்து, நெடுஞ்சாலைகள் மற்றும் நகர அபிவிருத்தி தொடர்பான நாடாளுமன்ற அமைச்சரவை ஆலோசனைக் குழுவின் அண்மைய கூட்டத்தில், அமைச்சர் பிமல் ரத்நாயக்க தலைமையில் இந்தத் திட்டம் தொடர்பாகக் கலந்துரையாடப்பட்டுள்ளது.
இந்த முன்மொழிவின்படி, வாகன உரிமையாளர்கள் வழக்கமான பதிவு இலக்கங்களுக்குப் பதிலாகத் தங்களது பெயர்கள் அல்லது வணிகப் பெயர்களைக் கொண்ட தனிப்பயனாக்கப்பட்ட இலக்கத் தகடுகளைப் பெற்றுக்கொள்வதற்கான வாய்ப்பை வழங்குவது குறித்து ஆலோசிக்கப்பட்டுள்ளது.
அத்துடன், அரசாங்கத்திற்கு மேலதிக வருவாயை ஈட்டுவதோடு, வாகன உரிமையாளர்களுக்கு அதிக தெரிவுகளை வழங்கும் நோக்கில், சிறப்பு வாகனப் பதிவு இலக்கங்களை அறிமுகப்படுத்துவது குறித்தும் குழுவில் விவாதிக்கப்பட்டுள்ளது.
எனினும், இத்திட்டத்தை நடைமுறைப்படுத்துவதற்கு முன்னர் அதன் தொழில்நுட்ப, சட்ட மற்றும் பாதுகாப்பு சார்ந்த தாக்கங்கள் குறித்து விரிவான மதிப்பீடு மேற்கொள்ளப்பட வேண்டுமென அதிகாரிகள் வலியுறுத்தியுள்ளதாகத் தெரிவிக்கப்படுகிறது.
இந்தக் கலந்துரையாடல்கள், இலங்கையில் மோட்டார் போக்குவரத்துத் திணைக்களத்தினால் முன்னெடுக்கப்படும் வாகனப் பதிவு முறையை நவீனமயமாக்கி, சேவைகளை மேம்படுத்துவதற்கான பரந்த முயற்சிகளின் ஒரு பகுதியாகக் கருதப்படுகின்றன.
இதேவேளை, தனிப்பயனாக்கப்பட்ட வாகன இலக்கத் தகடுகளுக்கான கட்டணக் கட்டமைப்பு மற்றும் இத்திட்டத்தை நடைமுறைப்படுத்தும் திகதி தொடர்பில் அரசாங்கம் இதுவரை எந்தவொரு அறிவிப்பையும் வெளியிடவில்லை என்பது குறிப்பிடத்தக்கது.
